Kapitulli 7 nga 15
Konfigurimet e faqes
WP Config, versioni dhe limitet e PHP, konfigurimi i Nginx, cron-i i WordPress dhe ridrejtimet: si i ndryshoni nga paneli i hostingut.
Në këtë udhëzues
Ky kapitull shpjegon cilësimet teknike të faqes që ndryshoni nga paneli i hostingut: WP Config, PHP, Nginx, Cron dhe ridrejtimet. Ndryshoni vetëm atë që ju duhet dhe provoni faqen pas çdo ndryshimi.
WP Config: debug dhe përditësimet automatike
wp-config.php është skedari kryesor i cilësimeve të WordPress. Te Configurations → WP Config, seksioni WP Config Manager ju lejon ta ndryshoni me çelësa, pa e hapur skedarin.
- Enable Debug Mode (WP_DEBUG) — aktivizon modalitetin e gjetjes së gabimeve.
- Enable Debug Log — i shkruan gabimet në një skedar log, që e lexoni te Logs → Debug Log.
- Enable Debug Display — i shfaq gabimet direkt në faqe.
- Enable Script Debug, Enable Script Concatenation, Enable Save Queries — opsione për zhvilluesit.
- Hapni Configurations → WP Config.
- Aktivizoni Enable Debug Mode (WP_DEBUG) dhe Enable Debug Log.
- Shtypni Save Changes.
- Përsëritni problemin në faqe, pastaj lexoni Logs → Debug Log.
- Kur të mbaroni, çaktivizoni debug-un dhe ruani përsëri.
Mos e lini Enable Debug Display aktiv në një faqe publike: vizitorët shohin mesazhe teknike gabimi.
Te Automatic Core Updates zgjidhni si përditësohet vetë WordPress:
- All updates (recommended) — të gjitha përditësimet (e rekomanduar).
- Minor and security only — vetëm përditësimet e vogla dhe të sigurisë.
- Disabled — asnjë përditësim automatik.
Butoni Edit Manually hap skedarin për redaktim të drejtpërdrejtë. Përdoreni vetëm nëse e dini saktë çfarë po ndryshoni.
PHP: versioni dhe limitet
PHP është gjuha në të cilën punon WordPress. Te Configurations → PHP gjeni:
| Cilësimi | Çfarë bën |
|---|---|
| PHP Version | 8.2, 8.3 ose 8.4 |
| PHP Memory Limit (MB) | Sa memorie mund të përdorë një kërkesë |
| Max Execution Time | Sa gjatë mund të punojë një kërkesë |
| Max File Upload | Sa skedarë njëkohësisht |
| Max File Upload Size (MB) | Madhësia maksimale e një skedari që ngarkoni |
| Max Input Time / Max Input Vars | Limitet për formularët dhe të dhënat që dërgohen |
| Process Manager Type | Static / Dynamic / On Demand, si dhe pm.max_children etj. |
| Enable PHP OPCache | Mban kodin PHP të gatshëm në memorie, faqja përgjigjet më shpejt |
- Hapni Configurations → PHP.
- Ndryshoni vlerën që ju duhet, p.sh. Max File Upload Size (MB) kur nuk ngarkoni dot një skedar të madh.
- Ruani ndryshimet dhe provoni faqen.
Para se të ndërroni PHP Version, përditësoni pluginet dhe temat dhe bëni një backup. Nëse diçka prishet, kthehuni te versioni i mëparshëm.
Nginx
Nginx është serveri web që u shërben faqet vizitorëve. Te Configurations → Nginx gjeni:
- Config Editor — redaktim i drejtpërdrejtë i konfigurimit, me butonin Restore Default për t'u kthyer te konfigurimi fillestar.
- Config Manager — opsioni "My site is behind Cloudflare proxy — Log real visitor IPs in Nginx". Aktivizojeni nëse domeni kalon përmes Cloudflare (shihni Domeni dhe DNS).
Një gabim në Config Editor mund ta bëjë faqen të paarritshme. Nëse ndodh, përdorni Restore Default ose na shkruani.
Cron
Cron-i i WordPress kryen punë të planifikuara (publikim i programuar, email, detyra të plugineve). Zakonisht ai niset vetëm kur dikush viziton faqen, ndaj në faqet me pak vizita detyrat vonohen. Te Cron Settings (nën Settings) mund ta ekzekutoni me cron të vërtetë serveri.
- Hapni Settings → Cron Settings.
- Zgjidhni sa shpesh të ekzekutohet: çdo N sekonda, minuta ose orë.
- Ruani.
Ridrejtimet
Ridrejtimi (redirect) e dërgon vizitorin nga një adresë e vjetër te një e re, p.sh. kur ndryshoni adresën e një faqeje.
- Hapni Performance → Redirect Rules.
- Te Redirect Manager shtypni Add New Redirect.
- Plotësoni adresën e vjetër dhe atë të re dhe ruani.
- Provoni adresën e vjetër në shfletues.
Ridrejtimi i www te domeni kryesor menaxhohet te Settings → General → Site Domains, jo këtu.
Keni nevojë për ndihmë?
Shkruani te mbështetja, në WhatsApp +355 67 496 3486 ose në info@appalbania.com.