Plugin-i i migrimit (open source)

Migration by AppAlbania është plugin-i për backup, rikthim dhe zhvendosje të faqeve WordPress që e ka ndërtuar AppAlbania dhe e ndan si projekt open source (licenca GPL-2.0). Është falas përgjithmonë: mund ta përdorni për t'u zhvendosur te ne, ose thjesht për backup-e të faqes suaj.

Çfarë bën

• Një skedar për gjithë faqen. Databaza, media, plugin-et, temat, must-use plugins dhe pjesa tjetër e wp-content futen në një skedar .xhin. Opsionalisht edhe skedarët bazë të WordPress.
• Pa kufi madhësie. Punon me hapa të vegjël me pika kontrolli, prandaj nuk ndikohet nga kufijtë e kohës apo të ngarkimit të serverit. Është ndërtuar për faqe shumë të mëdha.
• Vazhdon nëse ndërpritet. Nëse mbyllet skeda, bie lidhja ose serveri ndalon një kërkesë, puna vazhdon nga pika e fundit.
• Rikthim i sigurt. Databaza importohet në tabela të përkohshme dhe kalon në fund me një hap të vetëm. Faqja vazhdon të punojë deri në hapin e fundit.
• Lidhjet rregullohen vetë. Adresat dhe shtigjet e faqes së vjetër zëvendësohen automatikisht me të rejat, edhe brenda të dhënave të serializuara dhe JSON.
• I kompresuar dhe i verifikuar, me enkriptim opsional AES-256 me fjalëkalim.

Instalimi

1. Shkarkoni zip-in me butonin më sipër. Mos e hapni, WordPress e do zip-in siç është.
2. Në WordPress shkoni te Plugins → Add New → Upload Plugin, zgjidhni zip-in dhe klikoni Install Now.
3. Klikoni Activate. Në menunë e majtë shfaqet Migration.

Bëni një backup

1. Hapni Migration. Te karta Backup zgjidhni çfarë të përfshihet (Database, Media, Plugins, Themes…).
2. Klikoni Create backup. Shihni përqindjen, shpejtësinë dhe kohën e mbetur në kohë reale.
3. Kur mbaron, backup-i del te lista Backups, me butonat Download, Copy link, Restore dhe Delete.

Zhvendoseni faqen te AppAlbania Host

Ka dy mënyra. Në të dyja, faqja e re duhet të jetë krijuar më parë te hostingu ynë. WP Admin hapet me një klik nga paneli i hostingut.

A) Me lidhje migrimi (më e shpejta)

1. Në faqen e vjetër, te lista e backup-eve klikoni Copy link. Kjo është një lidhje e nënshkruar dhe me afat.
2. Në faqen e re instaloni plugin-in, hapni Migration dhe ngjiteni lidhjen te Restore or move.
3. Klikoni Restore. Serveri i ri e shkarkon skedarin direkt nga i vjetri dhe vazhdon nëse lidhja ndërpritet.

B) Me skedar

1. Në faqen e vjetër klikoni Download dhe ruani skedarin .xhin.
2. Në faqen e re, te Restore or move, tërhiqeni skedarin ose klikoni choose. Ngarkimi bëhet me pjesë, pa kufi madhësie.
3. Klikoni Restore.

Zgjidhni çfarë të riktheni

Para rikthimit hapet një dritare ku zgjidhni pjesët: Database, Media, Plugins, Themes, Must-use plugins, Other wp-content, WordPress core. Mund të riktheni vetëm ato që ju duhen.

Pas zhvendosjes

1. Kontrolloni faqen e re te adresa e përkohshme.
2. Drejtoni domenin te hostingu i ri. Rekordet e sakta shfaqen te llogaria juaj, shikoni Domeni dhe DNS.
3. Aktivizoni SSL falas, shikoni SSL dhe HTTPS.

Cilësimet dhe kontrolli i serverit

Te Settings zgjidhni kompresimin, backup-et automatike (dhe sa të mbahen), verifikimin pas çdo backup-i dhe vazhdimin e punës kur mbyllni faqen. Server check tregon PHP-në, memorien, kohën për kërkesë, madhësinë e ngarkimit dhe hapësirën e lirë.

Preferoni ta bëjmë ne? Migrimi i plotë është falas: hapni formularin e mbështetjes dhe zgjidhni Migrim falas, ose shikoni Mbështetja dhe migrimi.